నిశ్శబ్ద నిశి రాత్రి నుంచి,

నింగినేలే నెగడు రేడు కి స్వాగత ప్రవచనం పలుకుతూ..
అమ్మ ఒడిని తిరిగి చేరుతున్న అలసిన గత వత్సరానికి వీడ్కోలు చెప్తూ..
బుడి బుడి అడుగులతో వడిగా కదన రంగం లోకి కాలిడింది నవ వత్సరం. ఆశల మలయ సమీరం !!

బాల భాస్కరాగమానానికి,

సాగర కెరటాల అలజడికి లేని సంవత్సరాల సందడి ,

మనిషికే ఎందుకూ అంటే ఆశ అన్న పదమే సమాధానమౌతుంది !!

గతాన్ని పునాదిగా ,భవిష్యత్ భవనానికి, నేడు రూపకల్పన చేయటానికి,
తనను తాను సరికొత్తగా సమీకరించుకోవడానికి ,సమరానికి సంసిద్దమవటానికి,
నరుని ప్రతి సృష్టి --నవ వత్సరమన్న సంరంభ కేళి!

హర్షాతిరేకాలను కలిగిస్తుందనేమో..

వర్షం అన్న పదానికి మరో అర్థం అయింది సంవత్సరం...!

తాజా తేదిలతో ఐనా జీవిత వీణపై సరికొత్త రాగాలు పలకాలని ఆకాంక్షల సమాహారం !!

కాలంతో నే కలిసి ప్రయాణం అయినపుడు

సమయ సంద్రం లొ ని ఒక్కో అలను తాకి తన్మయించాలనుకొవడం తప్పు కాదెమో!!

మారనిది మార్పు ఒక్కటే

వెన్నెలలు చిమ్మే జాబిలి
వేకువ తొ మాయమౌతుంది

వన్నెలు నిండిన అందమూ
వయస్సు తో ప్రయాణిస్తుంది

చుట్టూ చీకటిలా అనిపిస్తుంటే
కళ్ళు తెరవాలని అర్థం !

కరగని పర్వతంలా అవరోధం ఉంటె
అదే మార్గం మార్చాల్సిన సంధర్భం !!

ఏదీ శాశ్వతం కాదు ..అలాగని వైరాగ్యమూ వద్దు!

జీవితం అనే రంగుల తెరపై ఎపుడూ మారనది మార్పు ఒక్కటే..

నువ్వు చేయాల్సిందల్లా ఆ మార్పు కు నేర్పుగా కూర్పు మాత్రమే!


ఎపుడూ ఒకే దిశలో ప్రయాణం చేసేవాడు గమ్యం చేరలేడు !

పరిస్థితి ప్రకారం ప్రణాలిక మార్చేవానికి పరాజయం పరిచయం ఉండదు !!